ଭୀମସେନ କାହିଁକି ନିର୍ଜଳା ଏକାଦଶୀ କରିଥିଲେ ; ଜାଣନ୍ତୁ   ଏହାର କାରଣ

ଅନୁକୂଲସ୍ୟ ସଂକଳ୍ପ ପ୍ରତିକୂଲସ୍ୟ ବର୍ଜନ ରକ୍ଷସ୍ୟତି ଇତି ।
ବିଶ୍ୱାସୋ ଗୋ ତୃପ୍ତେ ବରଣଂ ତଥା ଆତ୍ମ ନିକ୍ଷେପ କାର୍ପଣ୍ୟ ଷଟ୍ ବିଧିଂ ଶରଣାଗତି ।।

ଶରଣାଗତିର ଏହି ୬ଟି ବିଧି କହିଛନ୍ତି ଗୋସ୍ୱାମୀ । ଅନୁକୂଲସ୍ୟ ସଂକଳ୍ପ ଯାହା ଭକ୍ତି ପାଇଁ ଅନୁକୂଳ ତାହାକୁ ସ୍ୱୀକାର କରିବା ଆବଶ୍ୟକ । ପ୍ରତିକୂଳସ୍ୟ ବର୍ଜନଂ ଯାହା ପ୍ରତିକୂଳ ତାକୁ ତ୍ୟାଗ କରିବା ଆବଶ୍ୟକ । ରକ୍ଷସ୍ୟତି ଇତି ବିଶ୍ୱାସୋ, ଏହା ପୂର୍ଣ୍ଣ ବିଶ୍ୱାସ ହେବା ଦରକାର । କୃଷ୍ଣ ମତେ ଅବଶ୍ୟ ରଖିବେ ବା ରକ୍ଷା କରିବେ । ଏହି ସବୁ ବିଧିରେ ଆମେ ଭକ୍ତି କଲେ ଶ୍ରୀକୃଷ୍ଣଙ୍କର ଶରଣାଗତ ହୋଇପାରିବା । ଭକ୍ତିର ସମସ୍ତ ବିଧି ମଧ୍ୟରୁ ଏକାଦଶୀ ବ୍ରତର ପାଳନ ମହତ୍ୱପୂର୍ଣ୍ଣ ଅଟେ । ପ୍ରତ୍ୟେକ ଶୁକ୍ଳପକ୍ଷ ଓ କୃଷ୍ଣପକ୍ଷରେ ଏକାଦଶୀ ବ୍ରତ ପାଳନ କରାଯାଏ । ଏହା ମାଧବ ତିଥି ଅଟେ ଓ ଭକ୍ତି ଜନନୀ ଅଟେ । ଏହାକୁ ପାଳନ କରିବା ପାଇଁ ଆମକୁ ଚେଷ୍ଟା କରିବା ଆବଶ୍ୟକ । ଏହା ଭକ୍ତି ଅନୁକୂଳ ଅଟେ ।

ଏକାଦଶୀ ମାତା ସ୍ୱୟଂ ଭଗବାନଙ୍କ ଶରୀରରୁ ପ୍ରକଟ ହୋଇଥିଲେ । ଏହି ତିଥି ଭଗବାନଙ୍କର ଅତ୍ୟନ୍ତ ପ୍ରିୟ ଅଟେ । ଏକାଦଶୀ  ଅନୁଷ୍ଠାନର ଅନେକ ବିଧି ଅଛି  |

1. ସର୍ବୋଚ୍ଚ ସ୍ତର ହେଉଛି ‘ନିର୍ଜଳା’ । 
2. ‘ନିର୍ଜଳା’ ହୋଇ ନ’ପାରିଲେ ‘ସଜଲା’ । ଆମେ ନିର୍ଜଳା ନ’କରିପାରିଲେ ସଜଲା ବା ଜଳପାନ କରି ଏକାଦଶୀ କରିପାରିବା । 
3. ତୃତୀୟ ବିଧି ସରସା । ଯେଉଁମାନେ ପାଣି ପିଇ ମଧ୍ୟ ଏକାଦଶୀ କରିବା ବିଧି ରହିଛି । ଏଥିରେ ଯଦି ଅସୁବିଧା ହୁଏ ପରବର୍ତ୍ତୀ ସ୍ତର ‘ସଫଳା’ ରହିଛି । ଫଳ ଖାଇ ମଧ୍ୟ ଏକାଦଶୀ କରାଯାଇ ପାରିବ । 
4. ସଫଳା ହୋଇ ନ’ପାରିଲେ ଅନୁକଳ୍ପ ପ୍ରସାଦ ବା ଉପବାସ ବ୍ୟଞ୍ଜନ ଖାଇ ମଧ୍ୟ ଏକାଦଶୀ କରିପାରିବା । ଏହି ଅନୁକଳ୍ପ ପ୍ରସାଦ ବା ଉପବାସ ବ୍ୟଞ୍ଜନ ମଧ୍ୟରେ ସାଗୁଦାନା ବା କୁଟୁଅଟାର ରୁଟି ଖାଇପାରିବେ ।

ନିର୍ଜଳା ଏକାଦଶୀର ମହତ୍ତ୍ୱ

ନିର୍ଜଳା ଏକାଦଶୀ ବା ଭୀମସେନ ଏକାଦଶୀ, ଜ୍ୟୈଷ୍ଠ ମାସ ଶୁକ୍ଳପକ୍ଷ ଏକାଦଶୀ ଦିନ ପାଳନ କରାଯାଏ ।କୁହାଯାଏ କି, ନିଜ ଜୀବନରେ ଥରେ ହେଲେ ବି ନିର୍ଜଳା ଏକାଦଶୀ ବ୍ରତ କରିବା ଜରୁରୀ । ଏହାକୁ କରିବା ଦ୍ୱାରା ମୋକ୍ଷ ପ୍ରାପ୍ତି ହୋଇଥାଏ । 

ଅନ୍ୟ ଏକାଦଶୀରେ ବ୍ରତୀମାନେ ଫଳାହାର କରିଥାନ୍ତି । କିନ୍ତୁ ଏହି ଏକାଦଶୀରେ କୌଣସି ଖାଦ୍ୟ କିମ୍ବା ଜଳ ମଧ୍ୟ ଗ୍ରହଣ କରାଯାଏ ନାହିଁ । ବିଶ୍ୱାସ କରାଯାଏ ଏହି ଏକାଦଶୀ ପାଳନ କଲେ ବ୍ରତୀକୁ ଆୟୁ, ନିରୋଗ ଏବଂ ମୃତ୍ୟୁପରେ ସ୍ୱର୍ଗପ୍ରାପ୍ତି ହୋଇଥାଏ । 

କିମ୍ବଦନ୍ତୀ

ପୌରାଣିକ କଥାବସ୍ତୁରୁ ଜଣାଯାଏ ଏହି ଏକାଦଶୀରେ ଭୀମସେନ ବ୍ରତ ରଖିଥିଲେ । ସେ ଯେକୌଣସି ଖାଦ୍ୟକୁ ସହଜରେ ହଜମ କରିଦେଉଥିଲେ । ତାଙ୍କ ଉଦରରେ ବୃକ ନାମକ ଅଗ୍ନି ଥିବାରୁ ସେ ଏପରି ଖାଦ୍ୟ ପରିପାକ କରିପାରୁଥିଲେ । ନାଗଲୋକ ଯାଇ ସେଠି ମଧ୍ୟ ଦଶକୁଣ୍ଡ ଦୁଗ୍ଧ ପାନ କରିଥିବାରୁ ସେ ଦଶ ହଜାର ହାତୀର ଶକ୍ତି ପ୍ରାପ୍ତ ହୋଇଥିଲେ । ଏହି ରସ ପ୍ରଭାବରୁ ତାଙ୍କର ପ୍ରଚୁର କ୍ଷମତା ବଢ଼ିଯାଇଥିଲା । ତେଣୁ ସେ ଏହି ବ୍ରତ ପାଳନ କରି ପାରୁନଥିଲେ । 

ଥରେ ଭୀମସେନ ମହର୍ଷି ବେଦବ୍ୟାସଙ୍କୁ କହିଲେ ଦ୍ରୌପଦୀ ଏବଂ ମୋର ସମସ୍ତ ଭ୍ରାତା ଏକାଦଶୀ ବ୍ରତ ରଖୁଛନ୍ତି । କିନ୍ତୁ ମୁଁ ଭୋକ ସମ୍ଭାଳି ନପାରିବାରୁ ବ୍ରତ କରିପାରୁନାହିଁ । ଆପଣ କୌଣସି ଏକ ଉପାୟ ବତାନ୍ତୁ । ବେଦବ୍ୟାସ କହିଲେ ତୁମେ ଜ୍ୟେଷ୍ଠ ଶୁକ୍ଳପକ୍ଷ ଏକାଦଶୀ ବ୍ରତ ପାଳନ କଲେ ବର୍ଷ ସାରା ଅନ୍ୟ ସବୁ ବ୍ରତର ଫଳ ମିଳିପାରିବ । ଏଥିପାଇଁ ତୁମକୁ ଉକ୍ତ ଏକାଦଶୀରେ ଦୁଇବେଳା ଭୋଜନ ଓ ଜଳତ୍ୟାଗ କରିବାକୁ ପଡ଼ିବ । ଏହିକଥା ଶୁଣି ଭୀମ ନିର୍ଜଳା ଏକାଦଶୀ ବ୍ରତ କରିବା ପାଇଁ ଯତ୍ନଶୀଳ ହେଲେ । ଭୀମସେନ ଏହି ନିର୍ଜଳା ଏକାଦଶୀ ବ୍ରତ ପାଳନ କରିଥିବାରୁ ଏହାକୁ ଭୀମସେନୀ ଏକାଦଶୀ ବୋଲି କୁହାଯାଏ ।  

ଯଦି ଏକାଦଶୀ କେହି ଭୂଲି ଯାଆନ୍ତି ବା କରି ନ’ପାରନ୍ତି ସେ ଦ୍ୱାଦଶୀ ଦିନ ଏକାଦଶୀ ବ୍ରତ କରିପାରିବେ । ଶାସ୍ତ୍ରରେ ତିନିଦିନ ଉପବାସର ପ୍ରଥା ରହିଛି । ଏହି ଗୋଟିଏ ନିର୍ଜଳା ଏକାଦଶୀ ବର୍ଷରେ ଥରେ ରଖିପାରିଲେ ଆମେ ଭକ୍ତି ପଥରେ ବହୁ ଆଗକୁ ଯାଇପାରିବା । 

ଏଭଳି ଜଳ ଗ୍ରହଣ କଲେ ବ୍ରତ ଭଙ୍ଗ ହୁଏନାହିଁ

ଯଦି ଆପଣ ବ୍ରତ ସମୟରେ ପାଣି ପିଇବାକୁ ଚାହୁଁଚନ୍ତି, ତେବେ କେମିତି ପିଇବେ । ଏହାକୁ ନେଇ କିଛି ବିଧି କୁହାଯାଇଛି, ତେବେ ଜାଣନ୍ତୁ କ’ଣ :

1. ନିର୍ଜଳା ଏକାଦଶୀ ଦିନ ଜଳ ଗ୍ରହଣ କରିବାକୁ ମନା କରାଯାଇଛି । ବ୍ରତର ନିୟମ ସଠିକ ଭାବେ ପାଳନ ନ କଲେ ବ୍ରତର ଫଳ କିଛି ମିଳିନଥାଏ । 
2. ତେବେ ବ୍ୟକ୍ତି ବ୍ରତ ସମୟରେ ଯଦି ଅତ୍ୟଧିକ ଦେହ ଖରାପ ହୋଇଯାଏ, ତେବେ ପାଣି ପିଇପାରିବେ । 
3. ତେଣୁ ଏଥିପାଇଁ ବ୍ରତଧାରୀ ୧୨ ଥର ଓମଃ ନମୋଃ ନାରାୟଣାୟ… ଜପ କରନ୍ତୁ   ।
4. ଏହାପରେ ଥାଳିରେ ଜଳ ଦେଇ ଆଣ୍ଠୁ ଏବଂ କହୁଣୀ ଲଗାଇ ପଶୁ ପାଣି ପିଇବା ଭଳି ପିଇପାରିବେ । ଏହିଭଳି ଜଳ ଗ୍ରହଣ କଲେ ବ୍ରତ ଭଙ୍ଗ ହୁଏନାହିଁ।

କରନ୍ତୁ ଏହି ମନ୍ତ୍ର ର ଜପ

ନିର୍ଜଳା ଏକାଦଶୀ ଦିନ ତଳେ ଦିଆଯାଇଥିବା ମନ୍ତ୍ରର ଜପ କରନ୍ତୁ,  ଏହି ସବୁ ମନ୍ତ୍ର ସବୁ ବିଷ୍ଣୁ ଙ୍କ ମନ୍ତ୍ର ଅଟେ ଓ ମନ୍ତ୍ର ଜପ କରିବା ଦ୍ଵାରା ବିଷ୍ଣୁ ଙ୍କ କୃପା ମିଳିଥାଏ  ।

1. ‘ଓମ୍‌ ନମଃ ଭଗବତେ ବାସୁଦେବାୟ’
2. ଓଁ ନମଃ ନାରାୟଣ, ଓଁ ନମଃ ଭଗବତେ ବାସୁ ଦେବାୟ |
3. ବିଷ୍ଣୁ  ଗାୟତ୍ରୀ ମହାମନ୍ତ୍ର -ଓଁ ନାରାୟଣ ବିଦ୍ମହେ । ବସୁଦେବାୟ ଧୀମହୀ । ତନ୍ନୋ ବିଷ୍ଣୁ  ପ୍ରଚୋଦୟତା ।
4. ବିଷ୍ଣୁ   କୃଷ୍ଣ ଅବତାର ମନ୍ତ୍ର – ଶ୍ରୀକୃଷ୍ଣ ଗୋବିନ୍ଦ ହରେ ମୁରାରୀ । ହେ ନାଥ ନାରାୟଣ ବାସୁଦେବାୟ ।
5. ବିଷ୍ଣୁ   ରୂପ ପୂଜନ ମନ୍ତ୍ର — ଶାନ୍ତ କରାମ ଭୁଜଗ ଶୟନମ୍ ପଦ୍ମ ନାଭମ ସୁରେଶମ୍ । ବିଶ୍ୱଧାରମ ଗଗନସାଦୃଶମ ମେଘବର୍ଣ୍ଣମ୍ ଶୁଭାଙ୍ଗମ୍ । ଲକ୍ଷ୍ମୀ କାନ୍ତମ୍ କମଲ ନୟନମ୍ ଯୋଗୀର୍ବିଧା ନାଗମିୟମ୍ ।

ପାଳନବିଧି

ଯଦି ଆମେ ବର୍ଷରେ ଗୋଟିଏ ଦିନ ନିର୍ଜଳା ଏକାଦଶୀରେ ଉପବାସ କରିପାରିବା ତେବେ ତାହା ବିଧିମୂଳକ ଭାବେ ବା ନିୟମ ମାନି କରିବା ଉଚିତ୍ । 

1. ଏହି ବ୍ରତ ରଖିବା ପାଇଁ ବ୍ରତଧାରୀଙ୍କୁ ଗୋଟେଦିନ ପୂର୍ବରୁ ଅନ୍ନ ତ୍ୟାଗ କରିବାକୁ ପଡିଥାଏ ।
2. ଏହି ଦିନ ସକାଳୁ ଜଲଦି ଉଠି ସ୍ନାନ କରି ବ୍ରତ ସଂକଳ୍ପ କରନ୍ତୁ   । ଶୁଦ୍ଧ କ୍ଷୀରରେ ଭଗବାନ ବିଷ୍ଣୁଙ୍କର ଅଭିଷେକ କରନ୍ତୁ    ।
3. ଏକାଦଶୀ ଦିନ ସକାଳୁ ସକାଳୁ ଶୀଘ୍ର ଉଠି ଭଗବାନ ସୂର୍ଯ୍ୟଦେବଙ୍କୁ ଏକ ଘଟି ଜଳରେ ଏକ ଚୁଟକି ହଳଦୀ ପକାଇ ଅର୍ପଣ କରନ୍ତୁ     ।
4. ଏହାପରେ ହଳଦିଆ ରଙ୍ଗର ବସ୍ତ୍ର ଧାରଣ କରି ଭଗବାନ ଶ୍ରୀହରି ବିଷ୍ଣୁଙ୍କର ପୂଜା କରନ୍ତୁ ମା ଲକ୍ଷ୍ମୀଙ୍କ ସହିତ ପୂଜା କରିବେ ।
5. ତାଙ୍କୁ ଏକ ତୁଳସୀ ପତ୍ର ପକାଇ ପଞ୍ଚାମୃତର ଭୋଗ ଅବଶ୍ୟ ଅର୍ପଣ କରିବେ ।
6. ଏହି ଦିନ ଏକ ଟୋପା ପାଣି ପିଇବା ଉଚିତ ନୁହେଁ ।
7. ଏକାଦଶୀ ଦିନ ସନ୍ଧ୍ୟା ସମୟରେ ତୁଳସୀ ଗଛ ସାମନାରେ ଗୁଆଘିଅରେ ଦୀପ ଜଳାନ୍ତୁ   ।
8. ଭଗବାନଙ୍କୁ ହଳଦିଆ ଫୁଲ ଅର୍ପଣ କରନ୍ତୁ   ।
9. ଭଗବାନ ବିଷ୍ଣୁଙ୍କର ପୂଜାରେ ଫଳ , ଅକ୍ଷତ , ଦୂବ ଓ ଚନ୍ଦନରେ ପୂଜା କରନ୍ତୁ   । 
10. ଭଗବାନ ବିଷ୍ଣୁଙ୍କୁ ଧ୍ୟାନ କରି ପୂଜା କରନ୍ତୁ    ।
11. ପୂଜା ପରେ ମଧ୍ୟ ଭଗବାନ ବିଷ୍ଣୁଙ୍କୁ ଧ୍ୟାନ ଏବଂ ନାମ ଜପ କରନ୍ତୁ   ।
12. ଏହାସହିତ ୬୪ ମାଳା ଜପ କରିପାରିବା  ।
13. ଓସ୍ତ ଗଛ ଭଗବାନ ବିଷ୍ଣୁ ବାସ କରନ୍ତି ବୋଲି କୁହାଯାଇଥାଏ ତେଣୁ ଏକାଦଶୀ ଦିନ ଓସ୍ତ ଗଛରେ ପାଣି ଢାଳନ୍ତୁ   ।
14. ଏଥିସହିତ ସ୍ୱାଧାୟ କରିବା, ପ୍ରବଚନ ଶୁଣିବା ଏବଂ ଭଗବାନଙ୍କ ବିଗ୍ରହ ସହ ସମୟ କାଟିବାର ବିଧି ରହିଛି ।
15. ଏକାଦଶୀ ପୂର୍ବଦିନ ସନ୍ଧ୍ୟାରୁ ପରଦିନ ସୂର୍ଯ୍ୟୋଦୟ ପରେ ବା ବ୍ରତ ଭାଙ୍ଗିବାର ସମୟ ପରେ ତୁଳସୀ ପତ୍ର ଗ୍ରହଣ କରି ଉପବାସ ଭାଙ୍ଗିବା ଉଚିତ୍ ।

ଦାନ

ପୁରା ଦିନ ବ୍ରତ ରଖିବା ପରେ ପର ଦିନ ସକାଳୁ ଗାଧୋଇ ଭଗବାନଙ୍କୁ ଭୋଗ ଲଗାନ୍ତୁ ଏବଂ ବ୍ରାହ୍ମଣକୁ ଦାନ କରି ବ୍ରତ ଶେଷ କରନ୍ତୁ   ।

1. ଯେମିତିକି ଅନାଜର ଦାନ କରିପାରିବେ । 
2. ଜଳର କଳସ, କପଡାର ଦାନ, ଆସନ, ଜୂତା,ଛତା,ପଙ୍ଖା ଏବଂ ଫଳର ଦାନ କରି ପାରିବେ । 
3. ଏହା ବହୁତ ଉତ୍ତମ ରହିବ। ଏହି ଦିନ ଯଦି କଳା ତିଳ ଏବଂ ଜଳ ଭର୍ତି କଳସର ଦାନ କରିବେ ତ ବର୍ଷ ସାରାର ସବୁ ଏକାଦଶୀ ବ୍ରତର ଫଳ ଏହି ଏକାଦଶୀ ବ୍ରତରେ ମିଳିଯିବ ।
4. ଜଳଛତ୍ର ସ୍ଥାପନା କରିବା ଉଚିତ |
5. ବୃକ୍ଷକୁ ପାଣି ଦେବା ଓ ବୃକ୍ଷରୋପଣ କରିବା ଉଚିତ |
6. ଏହି ଦିନ ଯିଏ ନିଜେ ନିର୍ଜଳ ରହି ବ୍ରାହ୍ମଣ ବା  ଗରୀବ ବ୍ୟକ୍ତିଙ୍କୁ  ଶୁଦ୍ଧ ପାଣି ଭର୍ତ୍ତି ମାଟି ପାତ୍ର  ଦାନ କଲେ , ତାଙ୍କୁ  ଜୀବନରେ କେବେ ବି କୌଣସି ଜିନିଷରେ ଅଭାବ ପଡି ନଥାଏ ।
7. ପଶୁପକ୍ଷୀଙ୍କ ପାଇଁ ଜଳ ଓ ଭୋଜନ ବ୍ୟବସ୍ଥା କରିବା ଉଚିତ |

ଯଦି କାହାରିକୁ ପାଉନାହାନ୍ତି ତେବେ ଅଳ୍ପ ଟଙ୍କା ବାହାର କରି ରଖି ଦିଅନ୍ତୁ ପରେ କାହାରିକୁ ଦାନ କରିଦେବେ।

କିଛି କାର୍ଯ୍ୟ ଏକାଦଶୀ ଦିନ କରିବା ଉଚିତ ନୁହେଁ

1. ଏକାଦଶୀ ଦିନ ସକାଳ ସୂର୍ଯ୍ୟ ଉଦୟ ହେବା ଠାରୁ ନେଇ ଦ୍ଵାଦଶୀ ଦିନ ସୁର୍ଯ୍ୟ ଉଦୟ ହେବା ପର୍ଯ୍ୟନ୍ତ ପାଣି ପିଇବା ଉଚିତ ନୁହେଁ ।
2. ଏହି ଦିନ ଚାଉଳ କେବେବି ବନାନ୍ତୁ ନାହିଁ। 
3. ଭୁଲରେ ବି ତୁଳସୀ ପତ୍ରକୁ ତୋଳିବେ ନାହିଁ। 
4. ଏହି ଦିନ ବ୍ରତ ରଖନ୍ତୁ କିମ୍ବା ନରଖନ୍ତୁ   ବ୍ରହ୍ମଚର୍ଯ୍ୟର ପାଳନ କରନ୍ତୁ    । 
5. ଏହି ଦିନ ରସୁଣ ପିଆଜ ମାଛ ମାଂସ ମଦର ସେବନ କରନ୍ତୁ ନାହିଁ। 
6. ଅନାବଶ୍ୟକ ଆଳସ୍ୟ କରନ୍ତୁ ନାହିଁ। ଏକାଦଶୀ କରିବା ଓ ସାରାଦିନ ଶୋଇ ରହିବା ମଧ୍ୟ ବର୍ଜନୀୟ ଅଟେ ।
7. ଏକାଦଶୀ ଦିନ କିଛି ବି ପୋକକୁ ନ ମାରନ୍ତି । 
   
8. ଏହି ଦିନ ବ୍ରସରେ ଦାନ୍ତ ସଫା କରନ୍ତୁ ନାହିଁ। କୌଣସି ଗଛର ଡାଳରେ ଦାନ୍ତ ସଫା କରନ୍ତୁ   । 
9. ବେଡ଼ରେ ଶୋଇବା ଉଚିତ ନୁହେଁ। ସମ୍ଭବତଃ ତଳେ ଶୋଇବେ । 
10. କାହାରିକୁ କଟୁ କଥା କୁହନ୍ତୁ ନାହିଁ ନଚେତ ଆପଣଙ୍କର ମନ ଅଶାନ୍ତ ରହିବ ପୂଜାର ପୁରା ଫଳ ମିଳିନଥାଏ ।

ଉପବାସର ମୂଖ୍ୟ ଉଦ୍ଦେଶ୍ୟ ହେଲା ଶରୀର ଉଦ୍ଦେଶ୍ୟକୁ ହ୍ରାସ କରି ଆତ୍ମାର ଉଦ୍ଦେଶ୍ୟ ଉପରେ ଧ୍ୟାନ ଦେବା । ସବୁ ବିଧି ନିୟମର ଉଦ୍ଦେଶ୍ୟ ହେଉଛି କରୁଣାମୟ ଭଗବାନ ଶ୍ରୀକୃଷ୍ଣଙ୍କୁ କାୟ ମନୋବାକ୍ୟରେ ଆତ୍ମାରେ ଧାରଣ କରି ସ୍ମରଣ କରିବା ଏବଂ ସେହି ପ୍ରେମମୟ କୃପାସିନ୍ଧୁ ପରମାତ୍ମା ଶ୍ରୀକୃଷ୍ଣ ଭଗବାନଙ୍କୁ କେବେବି ଭୁଲିଯିବା ନାହିଁ ।

ଜ୍ୟୋଷ୍ଠ ମାସରେ ଜଳ ସଞ୍ଚୟ କରିବା ଉଚିତ ଏବଂ ଜଳର ସଠିକ ବ୍ୟବହାର କରିବା ଉଚିତ ।