କେମିତି ପ୍ରସ୍ତୁତ କରିବେ ମକର ଚାଉଳ ?

ହିନ୍ଦୁ ଧର୍ମରେ ବହୁ ଧୁମ୍‌ଧାମ୍‌ରେ ପାଳନ କରାଯାଏ ମକର ସଂକ୍ରାନ୍ତି । ଏହି ପର୍ବର ମୁଖ୍ୟ ଆକର୍ଷଣ ହେଉଛି ମକର ଚାଉଳ । ପ୍ରତ୍ୟେକ ଓଡ଼ିଆ ଘରେ ମକର  ଚାଉଳ ନିଶ୍ଚୟ ପ୍ରସ୍ତୁତ ହେବ। ମକର ସଂକ୍ରାନ୍ତି ଦିନ ଠାକୁରଙ୍କ ପାଖରେ ଏହା ଭୋଗ ଲାଗେ । ପାଖ ପଡିଶାରେ ଦିଆନିଆ ହୁଏ ।  ମକର ଚାଉଳ ଯେପରି ସ୍ଵ|ଦିଷ୍ଟ ସେହିପରି ପୁଷ୍ଟିକର ମଧ୍ୟ । ପାରମ୍ପରିକ ଉପାୟରେ ତ ଏହା ପ୍ରସ୍ତୁତ କରାଯାଏ, ଏହାକୁ ଅଧିକ ସ୍ୱାଦିଷ୍ଟ କରିବା ଲାଗି ଏସବୁ ସାମଗ୍ରୀ ମିଶାଇପାରନ୍ତି ।

 ଆସନ୍ତୁ ଜାଣିବା ଏହାକୁ ପ୍ରସ୍ତୁତ କରିବାର ସଠିକ ପ୍ରଣାଳୀ

ସାମଗ୍ରୀ

1. ନୂଆ ବାସୁମତି ଅରୁଆ ଚାଉଳ –୧/ ୨ କପ୍‌ 
2. କ୍ଷୀର – ୧ କପ୍‌
3. ନଡ଼ିଆ କୋରା – ଅଧ କପ୍‌
4. କଦଳୀ – ୩ଟି ବା ଏକ ଗିନା  (ଛୋଟ ଛୋଟ କଟା ଯାଇଥିବ )
5. ସେଓ -୧ଟି
6. ଅଙ୍ଗୁର - ୧0 ଟି 
7. ଆଖୁ କଟା -ଅଳ୍ପ 
8. ପିଜୁଳି କଟା ଅଳ୍ପ 
9. କମଳା ଅଳ୍ପ 
10. ଡାଳିମ୍ବ – ଅଧା ଡାଳିମ୍ବ
11. ଚିନି/ଗୁଡ଼ – ଅଧ କପ୍‌ 
12. ଛେନା – ଗୋଟେ କପ୍‌
13. ଚେରି,କାଜୁ ,କିସମିସ,ପେସ୍ତା ବାଦାମ କଟା 
14. ଗୁଜୁରାତି ଗୁଣ୍ଡ  – ୧ ଚାମଚ
15. ଗୋଲମରିଚ ଗୁଣ୍ଡ – ୧ ଚାମଚ
16.  ୧/ ୨ଇଞ୍ଚ ଅଦା ଛେଚା

ପ୍ରଣାଳୀ

ନୂଆ ଅରୁଆ ଚାଉଳକୁ ଭଲ ଭାବରେ ଧୋଇ ତାକୁ ୩ରୁ ୪ ଘଣ୍ଟା ପାଇଁ ବତୁରାଇ ଦିଅନ୍ତୁ । ୪ ଘଣ୍ଟା ପରେ ଚାଉଳକୁ ଛାଣି ଦେଇ ବାଟି ଦିଅନ୍ତୁ । ଚାଉଳକୁ ବେଶି ବାଟିବେ ନାହିଁ, ଖଦଡ଼ା କରି ବାଟିବେ। ନଚେତ୍‌ ହାତରେ ଚକଟି ଦେଲେ ମଧ୍ୟ ନୂଆ ଚାଉଳ ଗୁଣ୍ଡ ହୋଇଯିବ ।

ଏବେ ଏହି ଚାଉଳରେ ନଡ଼ିଆ, କ୍ଷୀର, କଦଳୀ, ଚିନି, କଟା ଅଦା,ବିଭିନ୍ନ କଟା ଫଳ ପକାଇ ଚକଟି ଦେବେ । ଏହାପରେ କଟା ସେଓ, ଚିନି, ଡାଳିମ୍ବ, ଛେନା, ଗୁଜୁରାତି ଓ ଗୋଲମରିଚ ଗୁଣ୍ଡ ମିଶାଇବେ । ଏବେ ପ୍ରସ୍ତୁତ ହୋଇଗଲା ଓଡ଼ିଶାର ସ୍ପେଶାଲ ମକର ଚାଉଳ।

ଏହାକୁ ଠିକ୍‌ ଭାବେ ମିଶାଇ ତାହାକୁ ଭଗବାନଙ୍କ ପାଖରେ ଭୋଗ ଚଢ଼ାନ୍ତୁ । ପରେ ଏହାର ସେବନ କରନ୍ତୁ ।