ଶୀତ ଦିନେ ଏହି ଖାଦ୍ୟ ଖାଇବା ଦ୍ୱାରା ଶରୀର ଉଷ୍ମ ରହିଥାଏ

ଶୀତ ରତୁରେ ସାଧାରଣତଃ ରୋଗ ହେବାର ସମ୍ଭାବନା ଅଧିକ ରହିଥାଏ | ତେଣୁ ନିଜର ଅଧିକ ଯତ୍ନ ନେବାକୁ ହେବ ।କାରଣ ଏହି ରତୁରେ ଲୋକେ ଟିକେ ଅଧିକ ଅଳସୁଆ ହେବା ସହ ନିଜ ଖାଦ୍ୟ ପେୟ ପ୍ରତି ସେତେଟା ଧ୍ୟାନ ଦେଇ ନଥାନ୍ତି । ଏହା ବ୍ୟତୀତ ଫ୍ଲୁ ଏବଂ ଭୂତାଣୂ ସଂକ୍ରମଣଠାରୁ ରକ୍ଷା ପାଇବାକୁ ରୋଗ ପ୍ରତିରୋଧକ ଶକ୍ତି ମଧ୍ୟ ବଢ଼ାଇବା ଆବଶ୍ୟକ । କିନ୍ତୁ ଆପଣ ଯଦି ନିଜ ଖାଦ୍ୟ ପେୟ ପ୍ରତି ସାମାନ୍ୟ ସଚେତନ ରହିବେ ତେବେ ନିଶ୍ଚିତ ରୂପେ ରୋଗ ମାନଙ୍କ ଠାରୁ ନିଜକୁ ଦୁରେଇ ରଖିପାରିବେ | 

ତେବେ ଜାଣନ୍ତୁ ଖାଦ୍ୟ ବିଷୟରେ, ଯାହାକୁ ଶୀତଦିନେ ଖାଇ ଆପଣ ନିଜକୁ ଫିଟ ରଖିପାରିବେ |

ଚିନାବାଦାମ ବା ବାଦାମ ଲଡୁ

ବାଦାମ ଗୁଡ ମିଶାଇ ଲଡୁ ପ୍ରସ୍ତୁତ କରି ଖାଆନ୍ତୁ । ଏହାକୁ ଶୀତ ଦିନେ ଖାଇବା ଦ୍ୱାରା ସ୍ୱାସ୍ଥ୍ୟ ପାଇଁ ବହୁତ ଉପକାରୀ ହୋଇଥାଏ ।

• ଚିନାବାଦମରେ ପ୍ରଚୂର ପରିମାଣରେ ପ୍ରୋଟିନ୍ ରହିଛି । ଚିନାବାଦାମ ଖାଇଲେ ଅନେକ ସମୟ ଯାଏ ଭୋକ ହୋଇନଥାଏ । ଏଣୁ ଅତିରିକ୍ତ କ୍ୟାଲୋରୀରୁ ଆପଣ ରକ୍ଷା ପାଆନ୍ତି । ଏଥିରେ ଭିଟାମିନ୍-ବି, ଆମିନୋ ଏସିଡ୍ ଏବଂ ପଲିଫିନୋଲ ରହିଛି, ଯାହା ଶରୀରକୁ ସୁସ୍ଥ ରଖିଥାଏ । ଚିନାବାଦାମ ଖାଇଲେ ଏହା ଶରୀରକୁ ଆବଶ୍ୟକ ଶକ୍ତି ଯୋଗାଇବା ସହ ହୃଦରୋଗ ଜନିତ ସମସ୍ୟା ମଧ୍ୟ ଦୂର ହୋଇଥାଏ । 

ମୂଳ ଜାତୀୟ ପରିବା

ଶୀତ ଦିନେ ଋତୁକାଳୀନ ପରିବା ଖାଆନ୍ତୁ । ଗାଜର, ବିଲାତି, ମୂଳା, ପିଆଜ ଭଳି ମୂଳ ଜାତୀୟ ପରିବା ଅଧିକ ମିଳିଥାଏ ।  ଏହାକୁ ଖାଇଲେ ଶରୀରକୁ ପ୍ରିବାୟୋଟିକ ମିଳିଥାଏ, ଯଦ୍ଦ୍ୱାରା ଶରୀରର ଓଜନ କମିବାରେ ସହାୟକୁ ହୁଏ । ଏହି ପରିବାଗୁଡ଼ିକ ପୋଷକ ତତ୍ତ୍ୱରେ ଭରପୂର ଯାହା ରୋଗ ପ୍ରତିରୋଧକ ଶକ୍ତି ମଧ୍ୟ ବଢ଼ାଇବା ସହ ହଜମ କ୍ରିୟାକୁ ସୁଧାରିଥାଏ।

ସବୁଜ ପନିପରିବା

• ଶୀତଦିନରେ ତାଜା ସବୁଜ ପନିପରିବା ପ୍ରଚୁର ମାତ୍ରାରେ ମିଳିଥାଏ । ନିୟମିତ ନିଜ ଖାଦ୍ୟରେ ପନିପରିବାରେ ବିନ୍ସ, କୋବି, ଗାଜର, ବିଟ, ଟମାଟ ଆଦି ସାମିଲ କରନ୍ତୁ । ଏହା ସ୍ୱାସ୍ଥ୍ୟକୁ ଆବଶ୍ୟକ ପରିମାଣରେ ପୋଷକ ତତ୍ତ୍ୱ ଦେଇଥାଏ । ଯାହା ଖାଇଲେ ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଥାଏ। 

• ପାଳଙ୍ଗ, ମେଥୀ, ସୋରିଷ, ପୋଦିନା ଆଦି ଶାଗକୁ ଖାଦ୍ୟରେ ସାମିଲ କରନ୍ତୁ । ଏହାକୁ ତାଜା ଏବଂ ଭଲ ଭାବରେ ଧୋଇ ଖାଇବା ଉଚିତ୍ । ସବୁଜ ପନିପରିବା ଖାଇଲେ ଶୀତ ଦିନେ ଶରୀର ଦରଜ ହେବା ସମସ୍ୟାର ମଧ୍ୟ ସମାଧାନ ମିଳିଥାଏ।

ବାଜରା

ଓଜନ କମାଇବାରେ ବାଜରା ଖୁବ୍ ଉପକାରୀ ।  ବାଜରାରେ ଭିଟାମିନ୍-ବି ପ୍ରଚୁର ମାତ୍ରାରେ ରହିଛି । ଏହା କେଶ ପାଇଁ ମଧ୍ୟ ବହୁତ ଉପକାରୀ । ବାଜରା ଖାଇବା ଦ୍ୱାରା ମାଂସପେଶୀ ମଜବୁତ୍ ହେବା ସହ ଶରୀରକୁ ଶକ୍ତି ଦିଏ ଏବଂ ଓଜନ ନିୟନ୍ତ୍ରଣରେ ମଧ୍ୟ ସାହାଯ୍ୟ କରେ ।

ଘିଅ

ଶୀତ ଦିନେ ଘିଅ ଖାଇବା ଦ୍ୱାରା ବେଶ ଲାଭ ମିଳିଥାଏ । ଘିଅ ଶରୀରକୁ ଭିତରୁ ଗରମ ରଖିଥାଏ ।  ଘିଅରେ ଭିଟାମିନ୍ ଏ, ଡି, ଇ ଏବଂ କେ ରହିଛି ଯାହା ଓଜନକୁ ନିୟନ୍ତ୍ରିତ କରେ । ଦେଶୀ ଘିଅ ଶରୀରର ମେଟେବୋଲିଜମକୁ ସୁଧାରିଥାଏ, ଯାହା ମୋଟାପଣ ଆସିବାକୁ ଦିଏ ନାହିଁ ।

ଲହୁଣୀ

ଶୀତ ଋତୁରେ ଲହୁଣୀ ଶରୀର ପାଇଁ ବେଶ୍ ଉପଯୋଗୀ । ଚେଷ୍ଟା କରନ୍ତୁ ଘରେ ଯେପରି ଲହୁଣୀ ପ୍ରସ୍ତୁତ କରିପାରିବ । କାରଣ ଏଥିରେ ଫ୍ୟାଟ୍ ନ ଥାଏ । ଶୀତ ଦିନରେ ତ୍ୱଚାକୁ ଶୁଖିଲା ହେବାକୁ ଦିଏ ନାହିଁ ଏବଂ ହାଇଡ୍ରେଟ୍ ରଖିଥାଏ । ଏହାଛଡ଼ା ହାଡ଼କୁ ମଜବୁତ କରିବା ସହ ଇମ୍ୟୁନିଟି ବଢ଼ାଇଥାଏ ।

ରାଶି

• ଥଣ୍ଡା ଦିନରେ ରାଶି ଜାତୀୟ ଖାଦ୍ୟ ଖାଇବା ଦ୍ୱାରା ଶରୀର ଉଷ୍ମ ରହିଥାଏ । ଏଥିରେ କ୍ୟାଲସିୟମ, ପ୍ରୋଟିନ, ଭିଟାମିନ୍ ଇ ଆଦି ପ୍ରଚୁର ମାତ୍ରାରେ ରହିଛି । ତେଣୁ ଏହାକୁ ଖାଇବା ଦ୍ୱାରା ଶରୀରକୁ ଶକ୍ତି ମିଳିଥାଏ ।

• ଶୀତ ଦିନେ ହାଡ଼ ଏବଂ ଗଣ୍ଠି ଦରଜ ଏକ ସାଧାରଣ ସମସ୍ୟା ହେଲେ ବି ଯନ୍ତ୍ରଣାଦାୟକ । ଏଥିରୁ ରକ୍ଷା ପାଇବାକୁ ହେଲେ ନିଜ ଖାଦ୍ୟ ସୂଚୀରେ ରାଶିକୁ ସାମିଲ କରନ୍ତୁ । ଏହା ହାଇପରଟେନସନକୁ ମଧ୍ୟ ଦୂର କରିଥାଏ, ଯାହା ଫଳରେ ଭଲ ନିଦ ହୁଏ ।

ଶୀତ ଦିନ ସମୟରେ ବୟସ୍କ ହୁଅନ୍ତୁ ଅଥବା ପିଲା ଥଣ୍ତା ଜ୍ୱର ଆଦିରେ ଆକ୍ରାନ୍ତ ହୋଇଥାନ୍ତି । ଆଜି ଆପଣଙ୍କୁ ଏଭଳି କେତେକ ଖାଦ୍ୟ ବିଷୟରେ କହିବୁ ଯାହାକୁ ଆପଣ ଖାଇବା ଦ୍ୱାରା ଥଣ୍ତା ଜନିତ ସମସ୍ୟାରୁ ମୁକ୍ତି ମିଳିବ ।

ମିଶ୍ରି ଓ ରାଶି

ମିଶ୍ରି ଓ ରାଶି ମିଶାଇ ଖାଇବା ଦ୍ୱାରା ଥଣ୍ତା କାଶରୁ ମୁକ୍ତି ମିଳିଥାଏ । ରାଶି ଲଡୁ ଖାଇବା ମଧ୍ୟ ସ୍ୱାସ୍ଥ୍ୟ ପାଇଁ ବହୁତ ଉପକାରୀ ଅଟେ |

ଅଳସୀ

ଅଳସୀର ମଞ୍ଜିରେ ଗୁଡ ମିଶାଇ ଖାଇବା ଦ୍ୱାରା ଥଣ୍ତା କାଶ ଦୂର ହୋଇଥାଏ । ଏହା ସହ ଏହାକୁ ଖାଇବା ଦ୍ୱାରା ଶରୀର ଉଷ୍ମ ରହିଥାଏ ।

ଡ୍ରାଇ ଫ୍ରୁଟ୍ସ

ଶୀତ ଦିନରେ ଡ୍ରାଇ ଫ୍ରୁଟ୍ସ ଖାଇବା । ଏହା ଶରୀରକୁ ଶକ୍ତି ଯୋଗାଇବା ସହ ଶରୀରକୁ ଥଣ୍ତାରୁ ଦୂରେଇ ରଖେ । ନିୟମିତ ଏହାକୁ ସେବନ କରିବା ଦ୍ୱାରା ତ୍ୱଚା ପାଇଁ ମଧ୍ୟ ଲାଭଦାୟକ ହୋଇଥାଏ |

ଅଦା

ଶୀତ ଦିନେ ଅଦାର ସେବନ କରି ପାରିବେ ,ଏହା ଶରୀରକୁ ଉଷ୍ମ ରଖିଥାଏ ଓ କଫ ଜନିତ ସମସ୍ୟା ଦୂର ହୋଇଥାଏ |